Быел «Татарстанда җәй» проекты кысаларында Түбән Камада ай саен җәмәгать урыннарында 138 дән артык ял чарасы планлаштырылган. Хәзерге вакытта инде 105 чара уздырылган, алар шәһәр халкы һәм кунаклары өчен якты вакыйгаларга әверелде. Бу хакта “Эшлекле дүшәмбе”дә Мәдәният идарәсе башлыгы Эльвира Кәримуллина сөйләде.

Программада мәдәни-спорт вакыйгалары, патриотик акцияләр, кино күрсәтүләр һәм ретро-концертлар каралган. Моннан тыш, җәйге чорда «Безнең ишегалды» республика программасы кысаларында 40 тан артык төзекләндерелгән ишегалды территориясен тантаналы рәвештә ачу көтелә.

Җәйнең төп вакыйгалары арасында - IX ачык төбәкара Стахеев фестивале, «Смена» Кама китап фестивале һәм «Знаковое место» заманча халык мәдәнияте фестивале. Чараларны оештыруда СИБУР һәм «Татнефть» кебек шәһәр барлыкка китерүче предприятиеләр мөһим роль уйный, алар шәһәрнең социаль һәм мәдәни инициативаларын хуплый.

Шулай ук «Сәламәт Түбән Кама» проекты дәвам итә, ул барлык теләүчеләр өчен бушлай сәламәт яшәү рәвеше буенча тренировкалар һәм лекцияләр тәкъдим итә. Июль һәм август айларында төрле этнофестивальләр һәм мәдәни вакыйгалар, шул исәптән стритбол буенча республика фестивале һәм шәһәрнең 60 еллыгына багышланган чаралар планлаштырылган.