Бүген Түбән Камада район башлыгы Радмир Беляев рәислегендә 10 нчы муниципаль инвестицион совет узды. Аның нәтиҗәләре буенча территория үсешенең төп юнәлешләрен үз эченә алган өч перспектив проектны гамәлгә ашыру хупланды.

Аерым алганда, инвесторларның берсе Каенлы авыл җирлеге территориясендә глэмпинг төзү проектын тәкъдим итте. Комплекс биш модульле йортны һәм сафари-тентларны үз эченә алачак. Ял итүне оештыру өчен атларда йөрүгә инфраструктура булдыру, экоферма ясау һәм, җирле буаны чистартып, балык үрчетү тәкъдим ителә.

Аннары үз инициативасын Мәскәү компаниясе тәкъдим итте. Ул Түбән Камада интеграцияләнгән климат инфраструктура платформасын урнаштыру буенча пилот проектын гамәлгә ашырырга планлаштыра. Система атмосфера һавасын локаль чистарту, шулай ук мониторинг һәм цифрлы аналитика өчен белешмәләр җыю өчен каралган.

Өченче проектны шәһәрдә инде өч ел эшләүче һәм ел саен 600 гә якын курсантны әзерләп чыгаручы «Айдрайвер» автомәктәбе тәкъдим итте. Компания чит мәйданчыкларны арендалаудан баш тартырга һәм үз автодромын төзергә ниятли. Район башлыгы бу идеяне хуплады һәм җир участогын сайлауга җентекләбрәк карарга кушты.