Федераль җыен Дәүләт Думасы депутаты Олег Морозов һәм Түбән Кама мэры Радмир Беляев Кама Аланы шәһәр тибындагы поселогында эш сәфәрендә булдылар.

Беренче булып алар 5 нче номерлы спорт мәктәбендә булдылар, биредә реконструкциядән соң баскетбол, бокс, дзюдо, ирекле көрәш һәм тхэквондо белән шөгыльләнү өчен заманча шартлар тудырылган. Объектны яңартуга республика бюджетыннан 523 млн сум бүлеп бирелгән. Яшь спортчыларны әзерләүдән тыш, биредә халыкның барлык төркемнәре арасында, фитнес һәм йога белән шөгыльләнүне дә кертеп, актив рәвештә сәламәтләндерү эшләре алып барыла, шулай ук өлкән буын өчен «Өченче буын университеты» эшли.

Шулай ук Олег Морозов һәм Радмир Беляев махсус хәрби операция ветераны Руслан белән очраштылар, мина-шартлаткыч җәрәхәтеннән соң аның аяк-куллары ампутацияләнгән. Сәламәтлеге буенча эштән азат ителгәннән соң ул Кама Аланы полициясендә хезмәтен дәвам итәргә теләк белдерә. Ир-ат ярдәм сорап Олег Морозовка һәм Радмир Беляевка мөрәҗәгать иткән.

«Чулман-Су» мәдәни үзәгендә халык белән «сорау-җавап» форматында узган очрашуда Кама Аланы шәһәр тибындагы поселогы башлыгы Александр Павлов башкарылган эшләр турында хисап тотты. Ул «Сөенеч» скверын төзекләндерүнең тиздән тәмамлануы турында хәбәр итте (IV чират), анда эшләрнең 80% тан артыгы тәмамланган. Шулай ук шәһәр тибындагы поселокның дүрт ишегалдында эшләр финиш сызыгына чыккан. Киләсе елда Кама Аланы территориясендә «Безнең ишегалды» республика программасын тулысынча ябу планлаштырыла.

«Мандарин» яр буен һәм пляжын төзекләндерү, балалар бакчаларын ремонтлау, яшүсмерләр футболын үстерү һәм студентлар тулай торагы төзү фикер алышуның төп темалары булды. Җыелышта җавапсыз калган сораулар эшкә алыначак, ә нәтиҗәләр халыкка җиткереләчәк.

«Халык белән очрашу кешеләрнең көн саен нинди проблемалар белән очрашуларын күрсәтте. Диалог ачык һәм ышанычлы килеп чыкты. Күренеп тора, халык үзләренең кече ватанын чын күңелдән ярата. Мин үз ягымнан күтәрелгән мәсьәләләрне федераль дәрәҗәдә хәл итү өчен бөтен көчемне куячакмын», — дип нәтиҗә ясады Дәүләт Думасы депутаты Олег Морозов.