Түбән Камада татар шагыйре һәм журналисты Муса Җәлилнең тууына 120 ел тулуны тантаналы рәвештә билгеләп үттеләр. Халык иҗаты йортында язучының һәм аның көрәштәшләренең портретлары галереясы, шулай ук китап ярминкәсе оештырылды. М.Җәлил исемендәге 1 нче гимназия шагыйрь хезмәт иткән Волхов фронтында эзләүчеләр тапкан тарихи артефактлар күргәзмәсен үткәрде.

Беренче муниципаль «Батырлык юллары» конкурсында җиңүчеләр шагыйрьнең әсәрләрен укыдылар һәм бүләкләр алдылар.

Кичәне режиссер Марат Абдуллин җитәкчелегендәге «МУСА» музыкаль-шигъри перформансы тәмамлады. Түбән Кама артистлары шигырьләр, музыка һәм биюләр аша Муса Җәлил тормышын сурәтләделәр.