Түбән Камада 62 тукталыш павильонын карап тоту белән махсус идарәче компания шөгыльләнәчәк. «Эшлекле дүшәмбе»дә үзара файдалы хезмәттәшлек турындагы килешүгә шәһәр Башкарма комитеты җитәкчесе Ренат Шакиров һәм «Билбордс» ҖЧҖ компаниясе проекты җитәкчесе Никита Курынцев кул куйдылар.

Компания тукталыш павильоннарын карап тоту һәм ремонтлау буенча барлык йөкләмәләрне үз өстенә ала. Мондый алым идарә системасын үзгәртеп кенә калмый, ә икътисадый файда да китерә. Эшнең беренче этабында ук шәһәр елына якынча 1,6 млн сумны янга калдырачак, ул элегрәк әлеге объектларны тотуга бюджеттан бүлеп бирелә иде.

Павильоннарны идарәгә тапшыру бер үк вакытта өч бурычны хәл итәргә мөмкинлек бирә: инфраструктураның сыйфатын күтәрү, бюджетка йөкләнешне киметү һәм бизнесны шәһәр мохитен үстерүгә җәлеп итү.

Павильоннар белән идарә итү хокукын «Билбордс» ҖЧҖ ачык электрон аукцион нәтиҗәләре буенча алды. Компания алдагы хезмәттәшлеккә кызыксыну белдерде һәм шәһәргә калган объектлар тапшырылгач, булачак сату-алуларда катнашырга планлаштыра.