Бүген Түбән Камада Түбән Кама бер мандатлы округының территориаль һәм участок сайлау комиссияләре әгъзалары өчен белем бирү интенсивы уза. Укулар чираттагы сайлау кампаниясенә — IX чакырылыш РФ Федераль җыены Дәүләт Думасына депутатлар сайлауга әзерләнүгә багышлана.

Катнашучыларны сайлау бюллетеньнәре белән эшләү буенча практик дәресләр, сейф пакетлары белән эш итү кагыйдәләре, шулай ук сайлау участокларында иминлекне тәэмин итү мәсьәләләре көтә. Алынган белемнәрне ныгыту өчен программа ахырында комиссия әгъзалары тест узачак.

Шәһәр һәм район территориаль сайлау комиссиясе инде тавыш бирүгә актив әзерлек алып бара. Сайлаулар 18, 19 һәм 20 сентябрьдә узачак. Шәһәр һәм район территориясендә 117 участок сайлау комиссиясе төзелде. Тавыш бирүнең барлык пунктларында да видеокүзәтү оештырылачак – бу сайлау процессының үтә күренмәлелеген һәм ачыклыгын тәэмин итәргә мөмкинлек бирәчәк.