Хәзер «Нефтехимиклар» паркында демонтаж эшләре төгәлләнә. Параллель рәвештә белгечләр, кабат казу эшләрен башкарырга туры килмәсен өчен, җир асты коммуникацияләрен тикшерәләр. Бу хакта «Вконтакте»дагы үз битендә район башлыгы Радмир Беляев хәбәр итте.

Паркта фонтан калачак. Фикер алышулар нәтиҗәләре буенча аны үзгәртеп корырга һәм корылатырга карар кылынды. Проектка бизнес ягыннан да кызыксыну бар: паркта террасалы заманча ресторан төзергә әзер потенциаль инвесторлар барлыкка килгән инде.

Моннан тыш, администрация проект командасы белән берлектә күп функцияле павильон концепциясен эшли башлады. Яңа мәйданчык чаралар, мастер-класслар һәм шәһәр очрашулары уздыру өчен каралган.

Парк территориясендә атна саен җәмәгать киңлеген реконструкцияләү барышы буенча оператив штаблар үткәрелә – эшләрнең барлык этаплары буенча карарлар тикшерелә. Анда СИБУР, шәһәр администрациясе вәкилләре, проектлаучылар һәм подрядчылар катнаша.

«Кадерле түбәнкамалылар, эш вакытында территориягә керү чикләнгән, аңлап каравыгызны сорыйм. Тиздән биредә яңа ял итү зоналары, очрашулар, чаралар һәм гаилә ялы өчен урыннар булган заманча шәһәр киңлеге барлыкка киләчәк», - дип билгеләп үтте Түбән Кама районы башлыгы Радмир Беляев.

Реконструкцияне киләсе елның җәендә тәмамларга планлаштыралар.