Түбән Камада Владимир Винников истәлегенә футбол буенча традицион Халыкара турнирның рәсми ачылышы булды. 2 сентябрьдән 5 сентябрьгә кадәр дәвам итәчәк ярышлар Россиянең төрле почмакларыннан һәм якын чит илләрдән 2011 елгы футболчыларны җыйды. 

Быел кубок өчен түбәндәге командалар көрәшәчәк: 

• «Нефтехимик» ФК (Түбән Кама);

• «Урал спорт мәктәбе» (Екатеринбург);

• «Максат» (Казан);

• «Хезмәт резервлары» (Казан);

• «Зенит» олимпия резервы спорт мәктәбе» (Волгоград);

• «Әлмәт спорт мәктәбе»;

• «Абдыш-Ата» ФК (Кант, Кыргызстан).

Ачылу тантанасында мәртәбәле кунаклар, шул исәптән Түбән Кама шәһәр Советы депутатлыгына кандидат Радмир Беляев, «Нефтехимик» футбол клубы президенты киңәшчесе Наил Гыйззәтуллин, шулай ук Владимир Винниковның туганнары һәм дуслары, шул исәптән улы Константин катнашты.

«Төрле шәһәрләрдән катнашучыларны күрү шатландыра, - дип билгеләп үтте Радмир Беляев. - Укыту-тренировка комплексы базасында «Алмаш» лагерен ачтык, бу безгә киләчәктә дә Россия дәрәҗәсендәге ярышларны кабул итәргә мөмкинлек бирәчәк. Шәхесләребезне онытырга ярамый, һәм Владимир Винников истәлегенә мондый спорт чарасын уздыру - лаеклы үрнәк».

Константин Винников 19 ел дәвамында турнирны оештыруда ярдәм итүчеләргә бөтен гаиләсе исеменнән рәхмәт белдерде һәм катнашучыларга спортта да, тормышта да уңышлар теләде.

Тантаналы ачылыштан соң Түбән Каманың «Нефтехимиг»ы һәм Волгоградның «Зенит» олимпия резервы спорт мәктәбе» арасында матч булды. Турнирда катнашучыларның барысына да иганәчеләрдән истәлекле бүләкләр тапшырылды.

Турнир 1999 елдан 2005 елга кадәр Түбән Кама администрациясе аппараты җитәкчесе вазыйфасын башкарган Владимир Винников исемен йөртә. Ишегалды футболы һәм балалар-яшүсмерләр спорт мәктәбендә тәрбияләнгән Владимир Винников спортка чын күңелдән бирелгән иде һәм балалар спортын, бигрәк тә футболны үстерү өчен кулдан килгәннең барысын да эшләде.