ТР сәламәтлек саклау министры Альмир Абашев Түбән Кама үзәк район күп профильле хастаханәсенең 2 нче дәвалау корпусында булды, анда эндоскопия бүлеге һәм функциональ диагностика бүлеге эше белән танышты. Әлеге бүлекчәләр планлы рәвештә генә түгел, ашыгыч рәвештә дә ярдәм күрсәтергә әзер, бу шәһәр халкы өчен аеруча мөһим.

Альмир Абашев медицина җиһазларының торышын тикшерде, ФГДС кабинетының эш шартларын һәм эндоскопик җиһазларны эшкәртүне бәяләде. Процедуралар табибларның профессиональлеге аркасында пациентлар өчен максималь уңайлы һәм куркынычсыз уза — Түбән Камада югары квалификацияле табиблар командасы эшли.

Визит ахырында министр бүлекләрне заманча җиһазландыруның мөһимлеген билгеләп үтте. Бу мәсьәлә Түбән Кама үзәк район күп профильле хастаханәсенең баш табибы Сергей Мерясев белән аерым фикер алышу предметы булачак.