Район Советы һәм шәһәр Советының берләштерелгән сессиясендә Түбән Кама муниципаль районы Башкарма комитеты җитәкчесенең беренче урынбасары Марсель Хәйретдинов агымдагы елның беренче кварталында икътисадый үсеш турында хисап бирде. Доклад күтәренке рухта килеп чыкты: район ышанычлы рәвештә төяп җибәрелгән продукция күләме буенча республикада 4 нче урында тора. Өч ай эчендә бу күрсәткеч 123 миллиард сум тәшкил иткән.

Сизелерлек икътисадый файда китерә торган гамәлдәге җитештерү предприятиеләренә аерым игътибар бирелде. Микрофибрадан эшләнмәләр җитештерү белән шөгыльләнүче «Бикотекс», сыгылмалы төргәкләүдә махсуслашкан «Ай-Флекс» һәм газ турбиналары җитештерүче «Камэнергомаш» компанияләре үсеш локомотивларына әверелде. Бу предприятиеләргә инвестицияләрнең гомуми күләме 8 миллиард сумнан артып китте, ә аларның эшчәнлеге нәтиҗәсендә 1600 дән артык эш урыны булдырылды.

Хәзерге вакытта 18 инвестиция проекты гамәлгә ашыруның актив фазасында тора. Алар буенча кертемнәрнең гомуми күләме 1,5 триллион сумнан артып китә, ә яңа эш урыннары булдыру потенциалы 1654 берәмлек дип бәяләнә. Бу Түбән Кама районының югары инвестицион потенциалы һәм аның эре бизнес өчен кызыклы булуын күрсәтә.

«Восток» сәнәгать паркын һәм «Кама Аланы» туристлык-рекреация тибындагы махсус икътисадый зонасын төзү кебек киң колачлы инициативалар инвестиция алды стадиясендә. Бу проектлар үсеш өчен яңа мөмкинлекләр ача.

Кече һәм урта эшмәкәрлеккә ярдәм итү районның икътисадый үсешенең мөһим аспекты булып тора. Бүген Түбән Кама районында 8 меңгә якын кече һәм урта эшмәкәрлек субъекты теркәлгән, ә үзмәшгульләр саны 30 меңнән артык кешегә җитеп килә. Эшмәкәрлек активлыгын стимуллаштыру өчен даими рәвештә белем бирү чаралары: форумнар, конференцияләр, ачык ишекләр көннәре үткәрелә. Болар барысы да Түбән Кама районының бизнесын үстерү һәм икътисадын ныгыту өчен уңай мохит тудыра.

Түбән Кама мэры Радмир Беляев икътисад шәһәр һәм районның яшәешен тәэмин итүнең нигезе булып тора дип җиткерде: «Инвесторлар белән эшләү, инвестицион проектларның инициаторлары белән даими элемтәдә булу һәм аларны озата баруны тәэмин итү мөһим. Моның өчен бездә эшмәкәрлеккә ярдәм үзәге бар. Бу эшне дәвам итүегезне сорыйм».