Республикада «Балыклар яшәсен» программасы актив гамәлгә ашырыла, ул балык запасларын саклауга һәм арттыруга юнәлдерелгән. Чараларның берсе Каракүл күлендә узды, анда ясалма уылдык чәчү урыннары булдырылды.

Һава торышының үзгәреп торуы һәм кеше факторы аркасында уылдык чәчү өчен табигый урыннар кими бара. Нарат ботакларыннан ясалган ясалма «өйләр» балыкка уңышлы үрчергә ярдәм итә. Нарат уылдыкны зарарлы микроблардан саклаучы махсус матдәләр бүлеп чыгара.

Красный Ключ урта гомуми белем бирү мәктәбе укучылары һәм Балалар экология-биология үзәгендә тәрбияләнүчеләр табигатьне саклауның мөһимлеген белеп кенә калмадылар, үз куллары белән уылдык чәчү урыннарын булдырдылар. Хәзер балалар табигатькә ничек ярдәм итәргә икәнен беләләр.