Түбән Камада масштаблы прививка кампаниясенә старт бирелде. Табиблар гриппның үзе түгел, ә катлауланулары белән куркыныч булуын искәртә. Риск төркемендә түбәндәге категорияләргә керүчеләр тора: өлкән яшьтәге кешеләр, хроник авырулары булган (йөрәк, сулыш, диабет, симерү һ.б.), йөкле хатын-кызлар (аларга 2 нче һәм 3 нче триместрларда прививка ясарга мөмкин).

Прививканы ике ысул белән алырга була:

• Үз поликлиникагыздагы терапевтка мөрәҗәгать итәргә һәм юллама алырга.

• Эштә вакцинацияләнергә. Коллективка 25 кеше җыелса, урынга медикларның махсус бригадасы чыгачак.

Быел 165 меңнән артык түбәнкамалыга прививка ясату планлаштырыла, шуларның 43 меңе — балалар. Вакцина ел саен, вирусның актуаль штаммнарыннан максималь саклануны тәэмин итү өчен, Бөтендөнья сәламәтлекне саклау оешмасы киңәшләре нигезендә яңартыла.