«База» креатив индустрияләр үзәгендә җирле эшмәкәрләр белән «Хакимият белән ачык диалог» форматында очрашу узды. Чарага төрле өлкәләрдән 100 дән артык эшмәкәр җыелды.

Эшмәкәрләргә республика һәм федераль ярдәм чаралары, шулай ук грант конкурслары турында сөйләделәр. Спикерлар булып Татарстан икътисад министрының беренче урынбасары Наталья Кондратова һәм ТР Эшмәкәрлеккә ярдәм фондының микрофинанслау үзәге җитәкчесе Вячеслав Соловьев чыгыш ясады.

«Түбән Кама районы ярдәм чараларыннан актив файдалана, бигрәк тә икътисадның реаль секторында. Территориядә җиде сәнәгать паркы эшли, ә «Түбән Кама» сәнәгать паркы – республика өчен үрнәкләрнең берсе», – дип ассызыклады Наталья Кондратова.

Түбән Кама муниципаль районы Башкарма комитеты җитәкчесе ярдәмчесе Ленар Әхмәтов билгеләп үткәнчә, Түбән Камада 7 меңләп кече һәм урта бизнес бар. Бу секторда 38 меңнән артык кеше эшли - бу шәһәр барлыкка китерүче предприятиеләргә караганда 20% ка күбрәк. Моннан тыш, районда якынча 24 мең үзмәшгуль теркәлгән.

Хәзер Түбән Кама күңел ачу һәм рестораннар, кунакханә эше һәм туризм өлкәсен киңәйтү белән кызыксына. Түбән Кама муниципаль районы Башкарма комитетының эшмәкәрлеккә ярдәм итү үзәге кызыксынган инвесторларга «бер тәрәзә» режимында консультация бирә.

«Мондый очрашулар бик файдалы. Без даими рәвештә хакимият вәкилләре белән очрашабыз, үзебез өчен ниндидер яңалык алабыз, эшчәнлегебезне шәһәр файдасына үстерү өчен файдалы алымнарга өйрәнәбез»,-дип билгеләп үтте Түбән Кама эшмәкәрләр берлеге әгъзасы, профориентолог Зөлфия Гайнетдинова.