Түбән Каманың Е.Н.Королев исемендәге политехника көллияте студенты Олеся Фәрдиева һөнәри осталык буенча «Профессионаллар» чемпионатында «бронза» яулады. «Су технологияләре» компетенциясе буенча финал этабы Мәскәүдә 21-25 апрельдә узды.

Конкурс биш модульдән торды: агынты һәм табигый суны сынау коагуляциясе, полипропилен торбаларны эретеп ябыштыру һәм насос монтажлау, су белән тәэмин итү һәм су агызу системасын проектлау, микробиология һәм бик арматурасын ревизияләү.

Россиянең төрле шәһәрләреннән килгән алты финалист арасында Олеся бердәнбер хатын-кыз иде. Политехника көллиятендә студент кыз «Биналар һәм корылмаларны төзү һәм эксплуатацияләү» белгечлеге буенча белем ала.