«Эшлекле дүшәмбе»дә Түбән Кама муниципаль районы Башкарма комитетының Административ-техник инспекциясе бүлеге башлыгы Альберт Гарифуллин шәһәр территориясен төзекләндерү һәм санитар карап тотуның торышы турындагы хисап тәкъдим итте.

Ул хәбәр иткәнчә, көн саен коммерция объектлары территорияләрен, тышкы реклама чараларын, җәмәгать транспорты тукталышларын санитар карап тотуга контроль үткәрелә. Административ-техник инспекция бүлегенең эш нәтиҗәләре буенча полициянең участок уполномоченныйлары белән берлектә 2026 елның гыйнварыннан июленә кадәр административ хокук бозулар турында 292 беркетмә һәм 2 меңнән артык күрсәтмә төзелгән.

Ташландык транспорт чараларын ачыклауга һәм эвакуацияләүгә, гражданнар мөрәҗәгатьләре буенча эшләүгә аерым игътибар бирелә. Узган ел газоннарда һәм балалар мәйданчыкларында законсыз парковка өчен өч кенә кеше җәза алган булса, агымдагы елда аларның саны 61 кешегә җиткән.

Агымдагы елда төрле платформалар аша 500 дән артык мөрәҗәгать килгән. Халык еш кына чүп-чардан, рөхсәтсез чүплекләрдән, яшел зоналарда машина кую урыннарыннан һәм күпфатирлы йортларга керү төркемнәренең торышыннан зарлана.