Түбән Камада балигъ булмаганнар эшләре буенча комиссиянең яшь хокук бозучыларны адаптацияләү һәм социализацияләү мәсьәләләренә багышланган киңәйтелгән утырышы узды. Фикер алышуда Түбән Кама прокуроры, хокук саклау органнары, мәгариф учреждениеләре һәм мәдәният өлкәсе вәкилләре катнашты.

Төп акцент җинаять кылган өчен җәмгыятьтән изоляциясез җәза үтәүче һәм тоткынлык урыннарыннан азат ителгән яшүсмерләр белән эшләүгә ясалды. Түбән Кама районында җәмәгать тәрбиячеләре беркетелгән җиде балигъ булмаган бала бар. Психолог Елена Ларина алар белән үзара хезмәттәшлек итүнең нәтиҗәле ысуллары белән уртаклашты: актив тыңлау, баланың ихтыяҗларына игътибар итү, гаеп ташламау, табибларга язылуда ярдәм итү һәм хөкем ителү билгесе аркасында кыенлаша торган эш табу. 

Түбән Кама мэры Радмир Беляев билгеләп үткәнчә, яшүсмерләрне эшкә урнаштыру – хокук бозуларны профилактикалауның мөһим аспекты: «Әгәр яшьләр файдалы эш белән мәшгуль икән, аларда тормышка кызыксыну һәм үсеш өчен стимул барлыкка килә».

Утырышта катнашучылар балигъ булмаганнарны интернеттагы зарарлы мәгълүматтан яклау һәм юлларда балалар травматизмын профилактикалау чаралары турында фикер алыштылар. Шулай ук 8 800 2000 122 номерлы балалар ышаныч телефонының бердәм линиясе эшләвен дә искә төшерделәр.

«Без күп нәрсәнең гаиләдән килүен аңлыйбыз, — дип нәтиҗә ясады Түбән Кама мэры Радмир Беляев. - Кайбер ата-аналар үзләренең бурычларына ваемсыз караган очракта да, без балаларга үсеш өчен сәламәт атмосфера булдырырга тиешбез. Барлык хезмәтләр һәм ведомстволарның тырышлыгын берләштереп кенә без яшьләр өчен уңайлы мохит булдыра алачакбыз».