Иртәгә яңа уку елы башлана. 2903 беренче сыйныф укучысы беренче тапкыр парта артына утырачак. Укучыларның гомуми саны, укучылар һәм студентларны да кертеп, 46 меңнән артып китә. 1 сентябрьдә тантаналы линейкалар штат режимында узачак һәм күпчелек мәктәпләрдә иртәнге 10 да башланачак. Бу хакта “Эшлекле дүшәмбе”дә Түбән Кама муниципаль районы Башкарма комитетының мәгариф идарәсе башлыгы Рөстәм Хуҗин хәбәр итте.

Бу уку елыннан мәктәпләрдә дәресләр вакытында телефоннар куллануга тулысынча тыю кертелә. «Җәмгыять белеме» фәне 9-11 сыйныфларда гына калачак, шул ук вакытта тарихны өйрәнү өчен сәгатьләр саны артачак. 5 сыйныфларда чит тел атнага ике сәгатькә кадәр кыскарачак, әмма шул ук вакытта гыйнварда яңа фән — «Россиянең рухи-әхлакый мәдәнияте» барлыкка киләчәк.

Районның педагогик коллективы эшкә әзер – аның сафларын 90 яшь белгеч тулыландырды, ә мәгариф өлкәсендә эшләүчеләрнең гомуми саны 4418 кешегә җитте.