Түбән Кама ЗАГСында тантаналы чара узды: тугыз гаилә күп балалы гаилә таныклыгы алды. Бу вакыйганы Татарстан Республикасы көненә багышладылар. Әлеге гаиләләрнең барысында да — өченче балалары, ә берсендә игезәкләр туган.

Түбән Кама мэры Радмир Беляев әти-әниләренә җылы сүзләр белән мөрәҗәгать итте: «Бүген бала тәрбияләү җиңел эш түгел. Без балаларны тәрбияләүгә күпме хезмәт, энергия һәм көч киткәнен беләбез — бу, һичшиксез, мактаулы һәм зур хөрмәткә лаек». Ул гаиләләргә эшләрендә уңышлар һәм финанс яктан иминлек теләде, ә муниципалитет исеменнән гаиләләр өчен уңайлы мохит булдыру эше дәвам ителәчәгенә ышандырды.

«Мин Түбән Камада тудым» муниципаль проекты кысаларында Татарстан Республикасында Кеше хокуклары буенча вәкаләтле вәкилнең җәмәгать ярдәмчесе Чулпан Ульданова һәр гаиләгә аерым бүләк — сабый сандыгы тапшырды. Анда яңа туган бала өчен беренче кирәк-ярак әйберләр тупланган.