Түбән Камада Яндекс СИТИ — интеллектуаль транспорт инфраструктурасы системасын эшләтеп җибәрделәр. Аны юбилей көнендә «Акыллы шәһәр» мәйданчыгында тәкъдир иттеләр.

Җиһазлар 64 автобуста һәм 43 трамвайда урнаштырылган инде. Система реаль вакытта транспорт хәрәкәтен күзәтергә, расписание үтәлешен контрольдә тотарга һәм пассажирлар агымын анализларга мөмкинлек бирә.

Яшәүчеләр «Яндекс Go» аша автобус яки трамвайның килү вакытын карый һәм юл өчен түли ала. 31 октябрьгә кадәр кушымта аша түләгәндә 50% ташлама гамәлдә — сәфәр 23 сум тора.

Транспорт хәрәкәте турындагы мәгълүматлар бердәм диспетчерлаштыру үзәгенә килә. Система шулай ук пассажирлар санын түләнгән сәфәрләр белән чагыштыра — транспортка карата аермалыклар ачыкланганда контролерлар җибәрергә мөмкиннәр.

Түбән Кама халкы өчен уңайлырак һәм яхшырак булсын өчен шәһәр процессларын цифрлаштыру эшен дәвам итәбез.