«Милләт кроссы – 2026» массакүләм йөгерешендә 11 меңнән артык түбәнкамалы катнашты. Быел чара Россия халыклары бердәмлеге елына багышланды һәм төрле яшьтәге һәм әзерлек дәрәҗәсендәге катнашучыларны җыйды. Йөгерү Шәһәр көнен бәйрәм итүнең матур башлангычы булды.

Түбән Кама районы башлыгы Радмир Беляев барлык катнашучыларны сәламләде: «Шәһәр көнен спорттан башлавыбыз бик яхшы! Чөнки спорт – ул сәламәтлек кенә түгел, ә тормышта җиңүгә таба мөһим адым да. Предприятие һәм оешмаларыбыз коллективларына, кече һәм урта бизнес вәкилләренә, уку йортларыбызга, бюджет өлкәсендә эшләүчеләргә һәм, әлбәттә, барлык халыкка рәхмәт белдерәсем килә. Без – бер зур гаилә, һәм бүгенге вакыйга моны раслый».

Котлауларга Тыва Республикасының Кызыл шәһәре башлыгы Айдын Сарыглар да кушылды, ул йөгерүчеләргә җиңел дистанция һәм яңа уңышлар теләде.

Иң яхшы спортчыларны йөгерү нәтиҗәләре буенча истәлекле медальләр һәм сыннар белән бүләкләделәр.