Бүген «СИБУР Арена НК»да балалар спортын үстерүгә зур өлеш керткән Түбән Кама администрациясе аппараты җитәкчесе Владимир Винников истәлегенә ХХ Халыкара турнир ачылды.  

Тантаналы ачылышта Түбән Кама муниципаль районы башлыгы Радмир Беляев, Казан мэры Илсур Метшин, РФ Дәүләт Думасы депутаты Айдар Метшин, шулай ук спорт ветераннары, Владимир Винниковның туганнары һәм якыннары, футбол сөючеләр катнашты.  

Турнир кунакларына һәм катнашучыларына Россия халыклары бердәмлеге елына һәм Түбән Каманың 60 еллыгына багышланган театральләштерелгән тамаша күрсәтелде. Тантаналы парадка Россиянең төрле шәһәрләреннән һәм Минскидан 2012 елгы сигез яшүсмерләр командасы чыкты. Дүрт көн дәвамында алар җиңүче исеме өчен көрәшәчәкләр.  

Турнирны «Нефтехимик» ФК һәм «Минск» ФК арасында матч ачты. Уен киеренке булды һәм тигез исәп белән тәмамланды — 2:2.