Түбән Кама химия-технология институты үз мәйданчыгында, төбәкнең 17 мәктәбе һәм 3 көллияте укучыларын берләштереп, Ачык ишекләр көне үткәрде. Югары уку йортының һәм аның стратегик партнеры СИБУРның төп максаты — яшьләргә уңышлы карьераны үз шәһәрендә төзергә мөмкин булуын күрсәтү.

Чарада 408 кеше кунак булды. Алар өчен биш тематик «станция» буенча интерактив квест әзерләнде, анда һәр факультет һәм кафедра үз эшләнмәләрен тәкъдим итте. Булачак студентлар «СИБУРИНТЕХ НК» уку үзәгендә миниатюрада ректификация җайланмалары эшен күрделәр, «Түбән Кама Нефтехим» җитештерү мәйданчыкларының виртуаль чынбарлыгын карадылар һәм институтның 26 фәнни-тикшеренү лабораториясенең заманча җиһазлары белән таныштылар.