«Безнең ишегалды» республика программасы буенча яңартылган ишегалдына шәһәр халкы гына түгел, авыл җирлекләре халкы да сөенә. Быел Ширәмәт авылында дүрт ишегалды ремонтланган - болар барысы да әлеге программа буенча башкарылган. Шулай итеп, бу территориядә аны гамәлгә ашыру 100 процент тәшкил итте.

Ачылу тантанасы Октябрь мәйданы урамындагы 17 нче йорт ишегалдында узды: биредә яшәүчеләр җырладылар, өй ризыклары белән өстәл әзерләделәр, ә балалар уеннарда катнашты.

Ишегалдында юллар ремонтланган, тротуарлар салынган, кечкенә архитектура формалары урнаштырылган. Янәшә торган дүрт эскәмияле мәйданчык барлыкка килү төп шатлык булды, яшәүчеләр хәзер анда даими җыела һәм уртак кичәләр үткәрә алачак.

Ишегалдын ачуда Түбән Кама районы башлыгы Радмир Беляев та катнашты. Ул актив кешеләргә рәхмәт хатлары тапшырды һәм яңа яшел зонада беренче агач утыртуда катнашты.