Н.В.Лемаев исемендәге Түбән Кама нефть химиясе һәм нефть эшкәртү көллияте базасында химия тармагының төбәкара укыту-методик үзәге төзеләчәк.

Инициатива «Яңа материаллар һәм химия» илкүләм проекты кысаларында РФ Мәгариф министрлыгы тарафыннан гамәлгә ашырыла. Ул химия тармагы өчен кадрлар әзерләүнең төбәкара тармак укыту-методик үзәкләрен төзүгә юнәлдерелгән. Үзәкләр «Профессионалитет» федераль проектына кергән көллиятләр базасында оештырылачак.

Н.В.Лемаев исемендәге нефть химиясе һәм нефть эшкәртү көллияте тәкъдим иткән укыту-методик үзәге программасы федераль танылу һәм СИБУР ярдәме белән финанслау алды.

Үзәкне төзү проекты 90 миллион сум күләмендә федераль грант отты. Матди-техник базаны үстерүгә тагын 20 шәр миллион сум акча СИБУР компаниясе һәм Татарстан Республикасы бюджеты кертәчәк. Инвестицияләрнең гомуми күләме 130 миллион сум тәшкил итәчәк.

Укыту-методика үзәгенең төп бурычы — сәнәгать предприятиеләренең чын ихтыяҗлары өчен заманча белем бирү программаларын эшләү. Түбән Камада тупланган тәҗрибә бөтен Россия буенча профильле көллиятләргә таратылачак.

Көллият, уку процессын камилләштереп, СИБУР белән тыгыз хезмәттәшлек итә. Түбән Кама нефть химиясе һәм нефть эшкәртү көллияте директоры Айдар Фәретдинов билгеләп үткәнчә, төп максат — студентка реаль производствода кирәк булган күнекмәләрне бирү.