KAMA TYRES шин комплексы һәм Казан милли тикшеренү технология университеты (КНИТУ) Түбән Кама химия-технология институты базасында «Эластомерларны эшкәртү технологиясе» фәнни-белем бирү үзәген төзеячәкләр. Тиешле документны «Татшина» ҖЧҖ генераль директоры Игорь Прокопьев һәм КНИТУ ректоры Юрий Казаков имзалады.

Проектның «юл картасын» гамәлгә ашыру ике елга исәпләнгән. 2028 ел ахырына Түбән Кама шинчылары һәм югары уку йорты өзлексез белем бирүнең нәтиҗәле чылбырын төзергә ниятли: «мәктәп — институт — җитештерү».

«Мондый өч яклы хезмәттәшлек мәктәпне тәмамлаучыларга һәм аларның ата-аналарына заманча уку шартлары дәрәҗәсен һәм һөнәрнең зарурилыгын аңларга мөмкинлек бирәчәк», - дип ассызыклады KAMA TYRES шин комплексы башлыгы Игорь Прокопьев.

Яңа Фәнни-белем бирү үзәге Студентлар урамы, 11 адресы буенча яңартылган бинада урнашачак. Хәзер корпуста капиталь ремонт эшләре тәмамланып килә.

1 сентябрьдә яңа уку кампусы бюджет урыннарга 40 студентны кабул итәчәк, ә 2028 елга KAMA TYRES шин комплексы 100 дән артык яшь инженерны тулыландырачак.