Мәңгелек ут янында Россия Хәрби-диңгез флоты оешуга 330 ел тулуга багышланган тантаналы митинг узды. Чарада Хәрби-диңгез флоты ветераннары, Түбән Кама районы администрациясе, иҗтимагый оешмалар һәм предприятиеләр вәкилләре катнашты.

"Түбән Кама диңгез һәм океаннардан ерак булса да, бу бәйрәм безнең шәһәр өчен аеруча әһәмиятле. Якташларыбызның күбесе флотта хезмәт иткән, ә бүген яңа буын, хәрби бурычларын лаеклы үтәп, данлы традицияләрне дәвам итә. Ватаныбызның диңгез чикләрен саклаган һәм саклавын дәвам иткән һәркемгә рәхмәтлебез", - дип билгеләп үтте Түбән Кама муниципаль районы башлыгы урынбасары Ленар Әхмәтов.

Татарстан Республикасында диңгез пехотачыларының «Тайфун» төбәк иҗтимагый оешмасының Түбән Кама бүлеге рәисе Алексей Демидов ветераннарны Хәрби-диңгез флоты юбилее белән котлады һәм Түбән Камада Хәрби-диңгез флоты геройларына һәйкәл төзү планнары турында сөйләде.

Хәрби бурычларын үтәгәндә һәлак булган диңгезчеләр истәлегенә митингта катнашучылар бер минут тынлык игълан итте. Чара барышында ветераннарга медальләр һәм рәхмәт хатлары тапшырылды.