«Ковер» яшьләр инициативалары үзәгендә Түбән Кама мэры Радмир Беляевның шәһәр иҗтимагый берләшмәләре вәкилләре һәм аларның остазлары белән ачык очрашуы булды. Дискуссиядә районда эшләп килүче җиде оешма – «Форпост» хәрби-патриотик хәрәкәте, Түбән Кама волонтерлар үзәге, Студентлар лигасы, Студентлар отрядлары штабы, Яшьләр парламенты һәм «Безнең яшьләр» клубы активистлары катнашты. Күптән түгел аларга яңа КВН берләшмәсе кушылды – әлегә ул нибары өч кешедән тора, әмма киңәергә планлаштыра.

Бүген Түбән Кама районында 69 меңнән артык яшь яши, халыкның нәкъ менә шушы актив өлеше үзгәрешләргә ихтыяҗ тудыра. Радмир Беляев яшь буын өчен заманча инфраструктура булдыруның мөһимлеген ассызыклады: «Түбән Кама өчен «Ковер» — яхшы киңлек, әмма бу гына җитәрлек түгел. Без фиджитал-үзәк төзибез, тиздән Алдынгылар йортын ачабыз – бу тагын бер тарту ноктасы булачак».

Очрашу азагында Түбән Кама муниципаль районы башлыгы иҗтимагый берләшмәләргә үсеш буенча конкрет үгет-нәсихәт бирде. Ул өч төп бурычны билгеләде: оешма эшчәнлегенә мөмкин кадәр күбрәк кешене җәлеп итү, республика дәрәҗәсенә чыгу һәм иң яхшылар булу, шулай ук бөтен шәһәр һәм республика сөйләячәк эре проектларны эшләтеп җибәрү.

Активистлар үзләрен борчыган темалар турында фикер алышу мөмкинлегеннән файдаландылар. Сораулар һәм җаваплар сессиясе барышында аларны депутатлар корпусы белән системалы хезмәттәшлек итү мөмкинлеге, шәһәр яшьләр үзәге аша эшкә урнашу перспективалары, шулай ук үзләренең социаль һәм иҗади инициативаларын тормышка ашыру өчен грант ярдәме алу механизмнары кызыксындырды.