Түбән Кама районы башкарма комитеты җитәкчесе вазыйфаларын башкаручы Радмир Беляев тиздән Вахитов урамыннан алып Шинчылар проспектына кадәр сузылачак аллеяны төзекләндерү эшләре башланачагын хәбәр итте.

Радмир Беляев сүзләренчә, аллея эскизы проекты инде расланган. Төзүчеләр трамвай юллары буенда гаилә белән йөрү өчен уңайлы урын булдырырга ниятлиләр. Шул рәвешле, “Гаилә” паркы тагын да җәлеп итүчәнрәк һәм иркенрәк булачак.

Моннан тыш, паркның Шинчылар проспекты ягыннан дүртенче чиратын үстерү планнары турында фикер алышынды. Су объектлары, җәяүлеләр өчен уңайлы юллар, шулай ук спорт мәйданчыклары булган зур функциональ территория төзү күздә тотыла.

Радмир Беляев түбәнкамалыларны 2026 елда «Тормыш өчен инфраструктура» илкүләм проекты буенча төзекләндерү өчен җәмәгать киңлеге сайлау буенча тавыш бирүдә активлык күрсәтергә һәм «Гаилә» паркына ярдәм итәргә чакырды.

Gorodsreda.tatar.ru сылтама буенча, ТР Дәүләт хезмәтләре порталында “халыктан сораштырулар” сервисы аша, шулай ук “ТР Хезмәтләре” мобиль кушымтасында тавыш бирергә мөмкин.