Түбән Кама районының кайбер балалар бакчалары мөдирләре ял көннәрендә эшләгән өчен отгул турындагы документларны дөрес рәсмиләштермәгәннәр һәм эш вакытын исәпкә алу табелен дөрес тутырмаганнар, шуңа бәйле рәвештә алар хезмәт хакына нигезсез түләүләр алганнар. Хокук бозулар Түбән Кама муниципаль районының контроль-хисап палатасының һәм район башлыгының коррупциягә каршы тору буенча ярдәмчесенең уртак эчке тикшерүе вакытында ачылган. Әлеге очрак коррупциягә каршы сәясәт мәсьәләләре буенча ачык хисапта яңгырады.

Мөдир тарафыннан 2023 һәм 2024 елларда ял һәм бәйрәм көннәрендә отгуллар алу нигезлелегенә 12 балалар бакчасы тикшерелгән. Шуларның икесендә отгул көннәрендә мөдиргә дүрт эш көне өчен акча түләнмәгәнлеге ачыкланган, чөнки алар бу акчаны отпуск акчасына алган булган. Әйтик, бер балалар бакчасында мөдиргә ике ел эчендә нигезләнмәгән 9,9 мең сум, икенчесендә 11,4 мең сум күчергәннәр.

Моннан тыш, биш мөдир тиешле отгулларның санын расламаган. Шул рәвешле аларның дүртесенә дәлилләнмәгән отгул өчен акча исәпләгәннәр, ә бер хезмәткәр документаль рәвештә дүрт отгулның дөреслеген раслый алмаган.

Тикшерү нәтиҗәләре буенча административ хокук бозулар турында беркетмәләр рәсмиләштерелгән – алар суд органнарына җибәрелгән. Бүгенге көндә артык түләнгән хезмәт хакы суммасы яңадан исәпләнгән.