Советлар Союзы Герое Гани Сафиуллин исемендәге Татарстан кадетлар корпусында яңа уку елы тантаналы линейкадан башланды. Тәрбияләнүчеләрне югары дәрәҗәле кунаклар — Татарстан Республикасы Премьер-министры урынбасары - Татарстан Республикасы икътисад министры Мидхәт Шаһиәхмәтов һәм Түбән Кама муниципаль районы башлыгы Радмир Беляев котлады.

Мидхәт Шаһиәхмәтов кадетларга ТР Рәисе исеменнән котлау тапшырды: «Әлеге бәйрәм меңләгән яшь татарстанлының хәтерендә якты эз калдырыр. Алда сезне тылсымлы чор көтә: тугры дусларны, бөек максатларга ирешү күнекмәләрен сезгә нәкъ менә мәктәп бирәчәк».

Кадет корпусының шәһәр һәм республика өчен аерым әһәмиятен Радмир Беляев ассызыклады: «Бу уку йорты күпләргә үрнәк. Без аның белән Түбән Камада һәм республикада гына түгел, ә бөтен илдә горурланабыз. Безнең кадет корпусы хәрби эш кадрларын әзерли. Барлык укытучыларга чын ир-атларны, чын Ватанны саклаучыларны әзерләгәннәре өчен рәхмәт белдерәсем килә».

Кадетлар үзләренең казанышлары белән хаклы рәвештә горурлана алалар. Быел җәй көне алар XII Халыкара «Айбын» хәрби‑патриотик җыенда Россияне лаеклы тәкъдим иттеләр. Ярышлар йомгаклары буенча команда гомумкоманда зачетында өченче урынны алды. Линейкада егетләрне яшь армиячеләр батырлыгы медале белән бүләкләделәр. Шулай ук олимпиадаларда җиңүчеләр һәм призерлар билгеләп үтелде.