Красный Ключ поселогында туган җыр, православие музыкасы һәм сүзләренә багышланган IX ачык төбәкара Стахеев «Ышанам» фестивале узды. Бәйрәм йөзләгән түбәнкамалыларны һәм шәһәр кунакларын берләштерде.

Фестиваль Казан Изге Ана иконасы храмында бәйрәм литургиясеннән башланды, гыйбадәт кылудан соң катнашучылар Изге Чишмәгә тәре йөреше ясадылар.

«Фестиваль инде тугызынчы тапкыр уза. Бу зур тәҗрибә һәм мөһим эш - безнең традицион рухи-әхлакый кыйммәтләребезне саклау һәм раслау. Шушы тамырлардан башка, тарихыбыздан башка киләчәкне күз алдына китерү мөмкин түгел. Бу мирас турында яшь буын белергә тиеш», - дип билгеләп үтте Чистай һәм Түбән Кама епискобы Филарет.

Бәйрәм «Мирас» мәдәният йорты каршындагы мәйданчыкта дәвам итте. Биредә мастер-класслар, «Осталар шәһәре» күргәзмә-ярминкәсе, рус кухнясы һәм халык уеннары мәйданчыклары, балалар программасы, картиналар күргәзмәсе, китап ярминкәсе, фотозоналар, күчмә манара эшләде. Шулай ук «Егетләрне ташламыйбыз» (СВОда катнашучыларга багышлап) һәм «Ак чәчәк» хәйрия акцияләре узды.

Түбән Кама муниципаль районы башлыгы Радмир Беляев фестивальне оештыручыларга рәхмәт белдерде: «Барысы да кешеләр кулы белән эшләнә. Бу игелекле чараны оештырган өчен рәхмәт». Ул шулай ук Стахеев утарын реконструкцияләү планнары турында сөйләде: «Хәзер проектлаштыру төгәлләнә, якын арада тарихи объектны реконструкцияләүгә керешү планлаштырыла. Бу чын-чынлап безнең шәһәр энҗесе булачак. Һәм һичшиксез киләсе елда бергәләп фестиваль үткәрәчәкбез, аны утар ачылуга багышларбыз».

Фестивальнең тантаналы өлешендә Рус халык традицияләрен, телен һәм мәдәниятен саклауда һәм үстерүдә актив катнашучыларны бүләкләделәр.

Көн дәвамында сәхнәдә халык, фольклор һәм вокаль коллективлар, шулай ук «Татарстанда җәй» проекты кысаларында солистлар чыгыш ясады.