Халыкка үзләрен администрация, күп функцияле үзәк яки башка дәүләт учреждениеләре хезмәткәрләре дип таныштырган кешеләрдән шалтыратулар килә башлады. Махсус хәрби операциядә катнашучыларның гаиләләре өчен түләүләр рәсмиләштерү сылтавы белән алар шәхси мәгълүматларны алырга яки төрле гамәлләр башкарырга ышандырырга тырыша.

Аеруча игътибарлы булуыгызны сорыйбыз. Дәүләт учреждениеләре хезмәткәрләре гражданнарга түләүләрне рәсмиләштерү, документларны раслау, кодларны СМСтан хәбәр итү яки сорауларны телефон аша хәл итү тәкъдиме белән шалтыратмыйлар. Барлык ярдәм чаралары рәсми каналлар аша яки шәхсән катнашу юлы белән генә рәсмиләштерелә.

Әгәр сезгә шундый шалтырату килсә:
 • паспорт мәгълүматларын, банк карталары реквизитларын һәм СМС кодларын хәбәр итмәгез;
 • әңгәмәдәшегез үтенече буенча сылтамалар буенча күчмәгез һәм кушымталар урнаштырмагыз;
 • сөйләшүне туктатыгыз һәм учреждениедәге мәгълүматны рәсми телефоннар аша мөстәкыйль рәвештә ачыклагыз.

Зинһар, туганнарыгызны, бигрәк тә өлкән яшьтәге кешеләрне кисәтегез. Берничә минут сөйләшү якыннарны җитди финанс югалтулардан саклап калырга мөмкин. Уяу булыгыз һәм рәсми мәгълүмат чыганакларына гына ышаныгыз.