Түбән Камада шәһәр мэры Рамил Муллин йөкләмәсе буенча Перинаталь үзәкле балалар шәһәр хастаханәсе базасында беренче конфликт үзәге барлыкка киләчәк.

Кичә Рамил Муллин шәһәр балалар хастаханәсендә булды, анда хәзер капиталь ремонт бара. Эш визиты барышында ул сырхауханә коридорларын һәм кабинетларын карады. Түбән Кама мэры хастаханәдә янгын куркынычсызлыгына аерым игътибар бирде, бинаның запас чыгу юлларын карады. «Бүлмәләр якты һәм уңайлы булырга тиеш. Коридорлар иркен булсын», - дип ассызыклады Рамил Муллин.

Моннан тыш, шәһәр балалар хастаханәсе базасында Түбән Камада конфликт үзәге барлыкка киләчәк. Килүчеләргә һәм сырхауханә хезмәткәрләренә уңайлы булсын өчен аерым бина бүлеп биреләчәк.

«Конфликт үзәгендә стационарда булган пациентларның төрле мәсьәләләре хәл ителәчәк. Документ белән, госпитализация белән, язу белән булган һәм башка сораулар каралачак», - диде Перинаталь үзәкле балалар шәһәр хастаханәсенең баш табибы Алексей Толстиков.

Түбәнкамалыларга уңайлы булсын өчен, авыруларга бәйле рәвештә пациентлар агымы да аеры каралачагын билгеләп үтте. «Югары температуралы авырулар йогышлы авырулар бүлеге пациентлары белән очраша алмаячак. Мондый карар ата-аналар, балалар, табиблар өчен дә уңайлы булачак», - диде Алексей Толстиков.

Сырхауханәдә өч төп керү урыны булачак, алар ярдәмендә ашыгыч ярдәм пациентлары һәм планлы килүчеләр аерылачак.