18-20 сентябрьдә түбәнкамалылар, сайлаучы беләзеген күрсәтеп, автобусларда һәм трамвайларда бушлай йөри алачак. Бу хакта «Эшлекле дүшәмбе»дә Түбән Кама муниципаль районы Советы аппараты җитәкчесе Ришат Нәфыйков сөйләде.

Ял көннәре чын бәйрәм булачак. 20 сентябрьдә сайлау участоклары янындагы территорияләр шәһәрнең 60 еллыгына багышланган мәдәни-патриотик программа мәйданчыклары булачак: анда Түбән Кама тарихы турында тематик күргәзмәләр эшләячәк һәм иҗат коллективлары чыгыш ясаячак.

Иртәдән буфетлар эшли башлаячак, ә үз эшләрен үзмәшгуль гражданнар тәкъдим итәчәк. Берничә участокта ЭКГ, офтальмолог, флюорограф һәм лекцияләр белән «Сәламәтлек нокталары» ачылачак. 27, 28 һәм 90 нчы балалар бакчаларында гаилә стартлары, шахмат турнирлары һәм эстафеталар узачак. Н.В.Лемаев исемендәге нефть химиясе һәм нефть эшкәртү көллиятендә, мәктәпләрдә һәм авыл җирлекләрендә маскировка челтәрләре үрү буенча мастер-класслар һәм хәйрия акцияләре оештыралар.

Мәктәпләр һәм стадионнар барлык яшьтәгеләр өчен дә бай программа әзерләгән.

Шулай ук сайлау көнендә түбәнкамалылар кыйммәтле бүләкләр уйнатып муниципаль конкурста катнаша алачак, аның нечкәлекләре шәһәрнең социаль челтәрләрендә һәм массакүләм мәгълүмат чараларында бастырылачак.