Түбән Камада гадәттән тыш хәлләр килеп чыкканда ишекләрне автомат рәвештә ачу системасы белән тәэмин итү буенча пилот проекты старт алды. Беренче яшеренү урыны Шинчылар урамы, 38 адресы буенча урнашкан күпфатирлы йортта ясала.

Система бердәм диспетчерлык хезмәте аша һава куркынычы турында сигнал килгәндә подвал ишекләрен автомат режимда ачарга мөмкинлек бирәчәк. Халыкка мәгълүмат бирү өчен яктылык индикаторы каралган: яшел сигнал – яшеренү урыны ачык, кызыл сигнал ябык дигәнне аңлата.

Яшеренү урыны кешеләр өчен минималь база комплекты белән җиһазландырылачак: эчә торган су, аптечка, янгын сүндергеч, фонарь, инструментлар һәм урнаштыру урыннары.