Түбән Кама муниципаль районы Башкарма комитеты җитәкчесе Радмир Беляев 3 мең квадрат метр мәйданлы тимер юл вокзалында булды. Объектны карау барышында ул транспорт төененең торышы белән танышты, Казан, Чаллы һәм Ижевск шәһәрләренә баручы автобус маршрутлары турында белеште. 

Радмир Беляев шулай ук дачага йөрү өчен автобуслардан даими рәвештә файдаланучы җирле бакчачылар белән аралашты һәм аларның объектны модернизацияләү буенча теләкләрен тыңлады. 

Түбән Кама муниципаль районы Башкарма комитеты җитәкчесе ассызыклаганча, автовокзал трансформациягә мохтаҗ: "Транспорт логистикасын дөрес оештырырга, пассажирларга уңайлы хезмәт күрсәтергә кирәк, шул вакытта ихтыяҗ да, пассажирлар күләме дә артачак”.

Шулай ук вокзал территориясендә урнашачак "Станция" яшьләр үзәге концепциясе буенча фикер алышу булды. "Ковер" яшьләр инициативалары үзәге директоры Булат Әюпов ассызыклаганча, яңа киңлек яшьләр өчен уңайлы булырга тиеш. Оештыручылар тарихны саклау максатыннан гипс панносын сакларга тели.

Биредә урам террасасын төзекләндерергә, бина эчендә төрле зоналар: сәхнә, амфитеатр, кафе, фиджитал ярышлар залы булдырырга ниятлиләр. Төрле фестивальләр һәм квартирниклар үткәрү мөмкинлеге барлыкка киләчәк.

Радмир Беляев идеяне бәяләде һәм креативлык өстәргә тәкъдим итте: "Безгә әлеге киңлекне яшьләр өчен магнит итәргә кирәк. Моның өчен безнең команда Мәскәү һәм Питердагы яшьләр үзәкләренә барачак. Эре шәһәрләр тәҗрибәсен үзләштерергә һәм югары дәрәҗәдәге үзәк булдырырга тырышачакбыз".