Бүген Советлар йортында район Советының һәм шәһәр Советының дүртенче берләштерелгән сессиясе узды, анда Түбән Кама шәһәре Башкарма комитеты җитәкчесе сайланды. Депутатлар бертавыштан Ренат Шакиров кандидатурасы өчен тавыш бирде.

Постка ике кандидат дәгъва итте: 2021 елда Түбән Кама муниципаль районы Башкарма комитеты җитәкчесенең беренче урынбасары вазыйфасын биләгән Ренат Шакиров һәм Түбән Кама муниципаль районы Башкарма комитетының икътисад һәм сәнәгать идарәсе башлыгы Евгений Борисов. 

Яңа җитәкченең идарә эшчәнлегендә шактый тәҗрибәсе бар. Ул Федераль салым хезмәтендә 14 елдан артык эшләгән. Аннары ТАИФ-НК компанияләр төркеме структурасында «Татнефтепродукт» генераль директоры булган.

Түбән Кама мэры Радмир Беляев Ренат Шакировны билгеләнүе белән котлады һәм яңа урында уңышлар теләде.

Контрактны имзалаганнан соң Ренат Габдрәшит улы депутатларга ышаныч белдергәннәре өчен рәхмәт белдерде һәм эшкә керешергә әзер булуын җиткерде: «Мин шәһәрне һәм анда яшәүчеләрне беләм, чөнки элек тә Түбән Камада эшләдем, һәм муниципалитет алдында нинди бурычлар торганын аңлыйм. Гадел, ачык һәм профессиональ эшләргә әзермен. Түбән Каманың заманча инфраструктура һәм сыйфатлы тормыш шәһәре булуын телим».