Түбән Камада «Җәяүле» профилактик операциясе дәвам итә. «Ике йөзләп җәяүле административ җаваплылыкка тартылган, аларның 45е светофорның кызыл сигналына чыгу кагыйдәләрен бозган өчен», – дип сөйләделәр безгә ЮХИДИдә.

Тәүлекнең караңгы вакытында бер генә җәяүледә дә яктылык кайтаручы элементлар юк иде. Шул ук вакытта ел башыннан 199 юл-транспорт һәлакәте теркәлгән, аларның 61е – транспорт чаралары бәрдерү, аларда 3 кеше һәлак булган һәм 65е – имгәнгән.
«Мондый юл-транспорт һәлакәтләрендә ешрак машина йөртүчеләр үзләре гаепле – куркынычсыз тизлек сайламаган, туктарга өлгермәгән, караңгыда күрмәгән, игътибарын читкә юнәлткән, - дип шәрехли ЮХИДИ идарәсе. - Әмма җәяүлеләрнең хаталары аркасында килеп чыккан очраклар да бар. Мондый 14 очрак».

Әгәр машина йөртүчеләр арасында соңгы берничә елда җәяүлеләрне үткәрү гадәткә керә башлаган икән, җәяүлеләр белән эшләү катлаулырак. Җәяүлеләрнең бернинди таныклыклары да юк, алар юл хәрәкәтендә бернинди имтихансыз катнаша. Юл хәрәкәте кагыйдәләре балачактан һәркемгә билгеле булуга карамастан, өлкәннәр еш кына аларны үтәргә кирәк дип санамыйлар.

"Төп кагыйдә бозу - юлны тиешле булмаган урында яки светофорның тыю сигналына чыгу. Җәяүлеләр еш кына шуны аңлап бетермиләр: тәүлекнең караңгы вакытында каршы транспорт фаралары яктылыгында кара киемдә силуэтлар сизелми дә диярлек, ә киемдә яктылык кайтаручы элементларны кию кабул ителми», - диләр ЮХИДИ хезмәткәрләре.

Тиешле булмаган урында юлны йөгереп узучы кеше - Түбән Кама өчен сирәк күренеш түгел. "Мондый хәл катлаулы кисешүләрдә дә, интенсив хәрәкәтле юлларда да кабатлана, - дип зарланалар ЮХИДИдә. - Күптән түгел Индустриаль урамындагы юл-транспорт һәлакәтендә һәлак булган пенсионер хатын моңа мисал булып тора».
Түбән Кама инспекторларының сүзләренә караганда, иң аянычлы хәл – олы кеше, баланы кулыннан тотып, тиешле булмаган урында яки светофорның кызыл сигналына юлны аркылы чыга. «Балаларга кагыйдәләрне аңлатуның файдасы юк, әгәр алар өлкәннәрнең шәхси үрнәге белән ныгытылмаган икән", - дип искә төшерә ЮХИДИ.