Бүген «СИБУР Арена-НК» спорт комплексы территориясендә «Вызов Первых» бөтенроссия проектының муниципаль этабы финалы узды. Командалар өч мәҗбүри дисциплинада көч сынаштылар: алга бөгелү, спорт скакалкасы һәм «вышибалы».

Финалда мәктәпләр һәм лицейлар базасында «Алдынгылар хәрәкәте»нең беренчел бүлекчәләреннән 11 команда көч сынашты. Алар өч категориягә бүленде: 13-15 яшь, 16-18 яшь һәм сәламәтлек мөмкинлекләре чикләнгән балалар өчен «махсус формат».

«Бүген бездә беренче тапкыр «Вызов первых» проекты кысаларында физкультура чарасы уза. Мин бу традициягә әйләнер дип өметләнәм», - дип билгеләп үтте Түбән Кама муниципаль районының «Алдынгылар хәрәкәте» җирле бүлекчәсе җитәкчесе Роза Фәйрушина.

Ярышлар йомгаклары буенча җиңүчеләрне һәм призерларны дипломнар һәм иганәчелек призлары белән бүләкләделәр. Үз категориясендә беренче урыннарны алган командалар «Вызов первых» проектының төбәк этабында Түбән Кама исеменнән чыгыш ясаячак.

16-18 яшьлекләр категориясендә Олы Афанас мәктәбе җиңү яулады, 13-15 яшьлекләр арасында 35 нче лицей командасы иң яхшысы булды, «махсус формат» категориясендә 1 урынны 18 нче мәктәп алды.