Түбән Кама районы Майскогорск авыл җирлегенең 500 дән артык кеше яши торган Трудовой поселогында Мәктәп урамы, 5, 6, 7 нче йортлар адресы буенча төзекләндерелгән яңа ишегалды ачылу тантанасы булды. Территорияне яңарту 2020 елда Татарстан Республикасы Рәисе тарафыннан башланган «Безнең ишегалды» республика программасы кысаларында башкарылды.

Төзекләндерү барышында тротуарлар һәм автомобиль юллары ремонтланган, заманча урам фонарьлары, уңайлы эскәмияләр һәм чүп контейнерлары куелган. Шатлыклы кешеләр республика һәм район җитәкчелегенә ишегалдын төзекләндерүләре өчен рәхмәт белдерделәр. Хәзер аларның ялы өчен уңайлы һәм куркынычсыз урын барлыкка килде.

Бәйрәм ачылышында Түбән Кама шәһәр Советына депутатлыкка кандидат Радмир Беляев һәм Майскогорск авыл җирлеге башлыгы Артем Морозов катнашты.

Радмир Беляев вакыйганың әһәмиятлелеген билгеләп үтте: «Шундый җылы традицияне дәвам итәбез — ремонттан соң ишегалларын ачабыз. Хәзер авыл җирлекләрендә барлык кирәкле инфраструктура бар, сезнең йорт яны территориясенең яңаруын күреп сөенәбез. Күршеләр белән бергә сез үз ишегалдыгызның матурлыгын саклап калырсыз, аны чәчәкләр белән бизәрсез дип ышанам».

Артем Морозов поселок халкына мөрәҗәгать итте: «Мәктәп елларын хәтерлим, пычрак булган чакта моннан үтеп булмый иде. Ә бүген без бөтенләй башка картина күрәбез. Барлык халык исеменнән республика һәм район җитәкчелегенә зур рәхмәтемне белдерәм. Төзүчеләр бик яхшы эш башкардылар, хәзер безнең уртак бурыч — чисталыкны һәм тәртипне саклау, ишегалды безне озак еллар шатландырсын!»

Быел Түбән Кама шәһәрендә  һәм районында 1 млрд сумнан артык суммага 53 ишегалды территориясен төзекләндерәчәкләр. Биш ел эчендә Татарстан Рәисе инициативасы белән оештырылган «Безнең ишегалды» программасы нәтиҗәсендә безнең районда 350 ләп ишегалды яңартылды – бу барлык йорт яны территорияләренең яртысыннан артыгы.

Бәйрәм чаралары тәмамланганнан соң, Радмир Беляев һәм Артем Морозов Бөек Ватан сугышы геройларын искә алдылар, мәктәп территориясендә урнашкан һәлак булган сугышчылар һәйкәленә чәчәкләр салдылар, шул рәвешле ата-бабаларның батырлыгына хөрмәт күрсәттеләр.