Түбән Кама медицина көллияте директоры Равил Гарипов Зәйнең өлкән сыйныф укучыларына һәм аларның әти-әниләренә әлеге учреждениедә укуның өстенлекләре турында сөйләде. Очрашу «Киләчәк һөнәр юлы» һөнәри юнәлеш бирү чарасы кысаларында узды.

Равил Гарипов укучыларны белгечлекләр белән таныштырды, кабул итү кагыйдәләре, бай студент тормышы һәм фәнни эшчәнлек турында сөйләде. Ул мәгариф системасындагы үзгәрешләргә аерым игътибар бирде. Әйтик, «Дәвалау эше», «Шәфкать туташы эше», «Фармация» белгечлекләрендә уку вакыты бер елга – 2 ел һәм 10 айга кадәр кыскарган. 2025 елда көллияттә яңа белгечлек – «Профилактик стоматология» ачылган.

«Бездә барлыгы 120 бюджет урыны бар. Бер урынга дүрт дәгъвачы исәпләнә», – диде Равил Рәшидович. Аның сүзләренчә, хәзер республиканың сәламәтлек саклау системасында югары квалификацияле фельдшерларга ихтыяҗ зур.