Түбән Кама районы башкарма комитеты җитәкчесе вазифаларын башкаручы Радмир Беляев шәһәрне җылылык белән тәэмин итү системасы белән җентекләп танышты. «Татэнерго»ның «Түбән Кама җылылык челтәрләре» филиалы директоры Илнар Галимҗанов һәм Төзелеш, ТКХ һәм төзекләндерү департаменты җитәкчесе Вадим Бровко белән берлектә узган профильле киңәшмәдә ул коммуналь челтәрләрне модернизацияләү буенча быелгы планнар турында фикер алышты.

Илнар Галимҗанов «Татэнерго» портфелендә 750 км челтәр булуы турында сөйләде, аларның күбесе нык тузган. Узган ел «ВКиЭХ»тан компания биләмәләренә күчкән челтәрләр аеруча борчу тудыра.

Челтәрләрне норматив хәлгә китерү өчен аларны модернизацияләүгә өч ел рәттән 2,2-2,5 млрд сум кертергә кирәк. Сүз уңаеннан, узган ел челтәрләрне алыштыруга 1,1 млрд сум бүлеп бирелгән – хәзер бюджетны 2,2 млрд сумга кадәр арттыру планлаштырыла.

Хәзерге вакытта «Татэнерго» 30 км чамасы челтәр алмаштырган һәм 37 үзәк җылылык пунктын ремонтлаган. Радмир Беляев җимерекләр күп булган урыннар һәм быелга эш планы белән танышты. "Татэнерго" 46 км челтәрне алыштырырга һәм объектларга 10 подряд оешмасын җәлеп итәргә планлаштыра. Эшләр графигы җылылык станцияләренең сүндерелүен исәпкә алып башкарыла.

Республикада беренче мәртәбә инженерлык челтәрләрен ремонтлау «Безнең ишегалды» программасы буенча төзекләндерү белән бергә алып барылды. Программа ишегалларының 50%ында челтәрләрне ремонтлау башланды инде. Төзүчеләр ишегалларын төзекләндерүгә тынычлап керешә алсын өчен, әлеге объектларда эшләрне 15 июньгә кадәр төгәлләргә кирәк. Шулай ук Радмир Беляев эшләр тукталган казылган участокларга игътибар итте. «Татэнерго»да барлык территорияләрне 31 майга кадәр төзекләндерергә вәгъдә иттеләр.

Кабинет киңәшмәсеннән соң Радмир Илдар улы җылылык челтәрләренә капиталь ремонт ясалган урыннарда да булды. Аңа яңартылган үзәк җылылык пунктларын, «Безнең ишегалды» объектларында һәм шәһәрнең иске өлешендә челтәрләрне ремонтлауны күрсәттеләр. Очрашу азагында Радмир Беляев «Татэнерго»га башкарган эшләре өчен рәхмәт белдерде һәм билгеләнгән срокларга тугры калырга, эшләрне оператив башкарырга һәм авария аркасындагы өзеклекләр турында хәбәр итәргә кушты.