Түбән Кама муниципаль районы башлыгы Радмир Беляев һәм Якутск мэры Евгений Григорьев шәһәрләр арасындагы чаралар планын килештерделәр. Тугандашлык өстәмә мөмкинлекләр бирә: үзара туристлар агымы, тәҗрибә уртаклашу, уртак проектлар, үсешнең яңа юнәлешләре, мәдәни алмашу. 

Моннан тыш, Радмир Беляев билгеләп үткәнчә, Түбән Кама Якутскиның катлаулы климат шартларында инженерлык челтәрләрен ремонтлау һәм аларга хезмәт күрсәтү тәҗрибәсен җентекләп өйрәнергә ниятли. Әлеге эшләнмәләр безнең районда инфраструктураны модернизацияләгәндә файдалы булачак.

Якутск, үз чиратында, Түбән Кама мәгариф системасы белән кызыксынды — мәктәпкәчә яшьтән алып урта һөнәри белемгә кадәр. Җитәкчеләр методикалар алмашу һәм якут чыгарылыш укучыларын безнең көллиятләрдә һәм химия-технология институтында укыту мөмкинлеге турында фикер алыштылар.

Махсус хәрби операциядә катнашучыларга һәм аларның гаиләләренә ярдәм итү юнәлешендә багланышлар мәсьәләләре аерым каралды. Тәҗрибә уртаклашу гамәлдәге чараларны киңәйтергә һәм яңа практикалар кертергә мөмкинлек бирәчәк.

Түбән Кама мэры очрашуга нәтиҗә ясады: «Эшнең барлык юнәлешләре район халкының тормыш сыйфатын яхшыртуга һәм шәһәрләребез арасында хезмәттәшлекне ныгытуга юнәлдерелгән. Нәтиҗәле хезмәттәшлеккә өметләнәбез!»