Татарстан Республикасында Кеше хокуклары буенча вәкаләтле вәкил Сәрия Сабурская һәм ТР Түбән Кама муниципаль районы Башкарма комитеты җитәкчесе Радмир Беляев агымдагы елның маенда ачылган «Ихлас-Искренность» ассоциациясенең пробация үзәгендә булдылар. Учреждение авыр тормыш шартларында булган кешеләргә вакытлыча яшәү, документларны торгызуда һәм иҗтимагый тормышка җайлашуда ярдәм күрсәтә.

Түбән Кама районы мөхтәсибе имамының социаль мәсьәләләр буенча урынбасары Марат Хәбибуллин үзәкнең максатлары һәм эш принциплары турында җентекләп сөйләде, биналар буйлап экскурсия үткәрде һәм кунакларны хәзерге торакчыларның берсе белән таныштырды. Үзәктә берьюлы 12 кешегә кадәр вакытлыча тору мөмкинлеге бар, әмма бүгенге көндә бер генә кеше яши. Адаптация программасын үткән калган кешеләр эшкә урнашканнар һәм торак белән тәэмин ителгәннәр.

Радмир Беляев коллективның керткән өлешен югары бәяләде һәм бинаны киңәйтүнең мөмкин булган ысулларын тәкъдим итте. Сәрия Сабурская үзәк җитәкчелегенә халыкка социаль ярдәм күрсәтү масштабларын сизелерлек арттырырга ярдәм итәчәк дәүләт грантларын бирүнең конкурс механизмнарына игътибар итәргә тәкъдим итте.