Кичә Түбән Каманың «Патриот» үзәгендә хәрби хезмәткә чакырылачак яшьләр арасында «Иң яхшы хәрби машина йөртүче-2021» республика ярышы булды. Ярышны ачу тантанасында Түбән Кама муниципаль районы Башкарма комитеты җитәкчесе Рамил Муллин һәм Татарстан Республикасы «ДОСААФ» идарәсе рәисе Сергей Старостин катнашты.

«Ярышның яшьләрне армиягә әзерли торган, төп юнәлеше – Ватанны сакларга өйрәтү булган «Патриот» үзәгендә узуы сөенечле. Бирегә көч сынашырга, осталыгыгызны күрсәтергә килүегезгә бик шатмын һәм сез чын сакчылар булырсыз дип өметләнәм. Ватанны саклау –ул, барыннан да элек, якыннарыңны, әти-әниеңне, үз җирлегеңне һәм үз илеңне саклау. Сезнең бу юлны сайлавыгыз куанычлы. Монда алган күнекмәләр сезгә тормышта ярдәм итәр дип уйлыйм», - дип белдерде Рамил Муллин.

«Бүген спорт ярышлары гына узмый. Бу – бөек «ДОСААФ» тарихын искә алу, ә бу – «ДОСААФ» мәктәбен үткән 100 меңнән артык курсант, аларның 30дан артыгы – Советлар Союзы Герое, 15 тән артыгы Дан ордены һәм башка дәүләт бүләкләре белән бүләкләнгән, - диде Сергей Старостин. - Безнең биләмәләр киң – Владивостоктан Калининградка кадәр һәм аны лаеклы рәвештә сакларга кирәк».

Ярышта республиканың 13 районыннан яшьләр берләшмәләре һәм «ДОСААФ» автомәктәпләре вәкилләре катнашты. Аларга юл хәрәкәте кагыйдәләрен белү, автомобиль төзелешен аңлату, ГТО нормаларын тапшыру, шулай ук «КамАЗ» йөк автомобилен йөртүдә үз осталыкларын күрсәтергә туры килде.

Ярыш нәтиҗәләре буенча «Машина йөртүче» юнәлешендә беренче урынны Түбән Кама командасы яулады, икенче урында – Арча, өченчедә Яр Чаллы вәкилләре.

ГТО нормаларын тапшыруда беренче урында – Чаллы, икенче урында – Чистай, өченчедә Тәтеш командалары.