Ихтыярый ярдәмче Ольга Шәрифуллина коронавирус белән авырып, февраль аенда госпитальдә яткан. Хәзер ул үзенең сәламәтлеген торгызу белән шөгыльләнә: диспансерлаштыру узып, көндезге стационарда тернәкләнү процедуралары курсын тәмамлаган.

Авыруның ни дәрҗәдә куркыныч һәм мәкерле булуын үз мисалында аңлаган Ольга Шәрифуллина хәйрия ярдәме оештыра, инде берничә мәртәбә госпитальдә ятучылар өчен кирәкле даруларга акча җыйган.



Бу юлы ул көндезге стационар мөдире Наталья Сәйфулинага ялгыз авырулар өчен оекбашлар һәм медицина битлекләре алып килгән.

«Сезнең бүләкләрне терапия бүлегенә тапшырырмын. Анда билгеле бер яшәү урыны булмаган пациентлар яки балалары баш тарткан өлкән яшьтәге кешеләр бар. Мондый ярдәмегез өчен рәхмәт сезгә!» - ди Наталья Сәйфулина.



Ольга Шәрифуллина кызы белән бергә COVID-госпитальнең чиста зонасында да булдылар. Анда ул, ярдәм йөзеннән, кәгазь, канцелярия товарлары, бер тапкыр кулланыла торган пеленкалар һәм памперслар калдырды.