Түбән Камадан Идел буе федераль округының Советлар Союзы Герое Гани Сафиуллин исемендәге Татарстан кадетлар корпусы кадетлары «Аҗаган 2.0» хәрби-патриотик уенының төбәк этабында җиңү яулады. Финалда бөтен Татарстаннан 20 командадан 200 иң яхшы катнашучы көч сынашты.

Уен җитәкчесе Александр Игошин сүзләренчә, катнашуга барлыгы 100 меңнән артык кеше гариза биргән. Сайлап алу берничә этапта узды — локаль ярышлардан алып шәһәр һәм район турнирларына кадәр. Командаларны өч яшь төркеменә бүлгәннәр: 11-13 яшь, 14-17 яшь һәм 18-21 яшьлек көллият студентлары.

Финал ярышлары Казан югары танк команда училищесы полигонында узды. Катнашучыларга, политруклар, командирлар, саперлар, хәрби корреспондентлар, медиклар, пилотсыз очкыч аппаратлары операторлары һәм штурмовиклар ролен үз өстенә алып, стандарт булмаган биремнәрне үтәргә кирәк иде. Мондый формат балаларга тактик күнекмәләр, креативлык һәм тапкырлык күрсәтергә мөмкинлек бирде.

Татарстаннан җиңүчеләр, Түбән Кама кадетларын да кертеп, «Аҗаган»ның бөтенроссия этабында республика исеменнән чыгыш ясаячак.