Түбән Каманың Е.Н.Королев исемендәге политехника көллияте студенты Усман Фәйзуллин «Минем төбәгемнең җирле үзидарә тарихы» бөтенроссия конкурсында икенче урын алды. Бүләкне аңа Мәскәүдә Союзлар йортында бәйрәм алдыннан тапшырдылар.

 Конкурска Усман Түбән Кама өчен күпне эшләгән танылган кешеләр — Евгений Королев, Николай Лемаев һәм Николай Зеленов турында тикшеренү проекты әзерләгән. Студентның эше яшь буынның үз шәһәренең тарихы һәм традицияләре белән тирән бәйләнешен күрсәткән.

 Проектның фәнни җитәкчесе Рәмис Хәйдәровка яшь талантларны үстерүгә керткән өлеше өчен рәхмәт хаты тапшырылды. «Минем төбәгемнең җирле үзидарә тарихы» конкурсы җиңүчеләргә югары уку йортларына кергәндә өстенлек бирә.